Novo estudo duplica as estimacións globais de biomasa e produtividade das pradeiras mariñas

Investigadores do G3ECA participaron nun estudo global que revela que a biomasa e a produtividade primaria neta das pradeiras mariñas son o dobre do que se estimaba ata agora. O traballo, que analiza datos de 11 xéneros de fanerógamas mariñas recollidos entre 1975 e 2024, identifica patróns globais de crecemento e estrutura, así como os factores ambientais que os impulsan. Os resultados tamén amosan como distintas especies de fanerógamas mariñas se adaptan aos seus contornos locais —desde a temperatura ata os nutrientes—, subliñando a súa extraordinaria capacidade de resiliencia. Estes achados ofrecen unha visión actualizada e esencial para a conservación e xestión sostible destes ecosistemas clave fronte ao cambio climático.